Transparencë totale për projektet me ndikim mjedisor

Të krijohet një platformë kombëtare publike ku të publikohen në kohë reale të gjitha projektet me ndikim mjedisor, së bashku me studimet e ndikimit në mjedis, kontratat, lejet, raportet e ekspertëve dhe vendimet përfundimtare. Publikimi i këtyre dokumenteve duhet të jetë i detyrueshëm të paktën 60 ditë para çdo vendimi për miratim. Për projektet me ndikim të lartë, konsultimi publik duhet të jetë i detyrueshëm dhe të zhvillohet në mënyrë transparente, me pjesëmarrjen e komuniteteve lokale, organizatave mjedisore dhe ekspertëve të pavarur. Çdo koment apo kundërshtim i paraqitur gjatë konsultimit duhet të marrë përgjigje të argumentuar nga autoritetet përkatëse përpara marrjes së vendimit final. Kjo do të garantonte një proces më demokratik, më transparent dhe më të mbështetur në prova shkencore.